LABARAI DAGA 24BLOG
'Yan jaridar sun taru  kayan aikinsu domin shiga wurin zaben su yi aikinsu na yada labarai, amma sai jami'an tsaro suka hana su shiga.
Duk kokarin manema labaran na shawo kan tawagar jami'an tsaron karkashin jagorancin jami'in 'yan sanda na ofishin Samaru, D. Moses, domin shiga wurin zaben ya ci tura.
Da manema labarai suka tambayi Moses ko baya tsoron karya dokar hakkin 'yan jarida, sai ya kada baki ya ce, "na gwammaci na samu matsala da manema labarai a kan na samu matsala da 'yan siyasa, saboda haka ba zan bari ku shiga ba tun da an ce kar na bari ku shiga "
Kokarin 'yan jaridar na neman kakakin hukumar 'yan sanda na jihar Kaduna, DSP Yakubu Sabo, ya saka baki ta hanyar tsawatar wa Moses bai yi aiki ba, saboda Moses din ya ki karbar waya domin yin magana da shi.
"Ba zan amsa kiran kakakin hukumar 'yan sanda na jihar Kaduna ba saboda gaba nake da shi a aiki. Ko ya kira ni ba zan amsa ba," a cewar D. Moses.
Sai dai kakakin ya bukaci 'yan jaridar da su kwantar da hankalin su domin yana tuntubar na gaba da shi a kan lamarin, kamar yadda kamfanin dillancin labarai na kasa (NAN) ya rawaito.